अथ राजसम्बन्धयोगाध्यायः॥ ४०॥
atha rājasambandhayogādhyāyaḥ || 40||

जनुर्लग्नादमात्येशयुतेक्षिते।
अमात्यकारकेणापि प्रधानत्वं नृपालये॥ १॥
janurlagnādamātyeśayutekṣite |
amātyakārakeṇāpi pradhānatvaṁ nṛpālaye || 1||

लाभेशवीक्षिते लाभे पापदृग्योगवर्जिते।
राज्यभावे तदा विप्र प्रधानत्वं नृपालये॥ २॥
lābheśavīkṣite lābhe pāpadṛgyogavarjite |
rājyabhāve tadā vipra pradhānatvaṁ nṛpālaye || 2||

अमात्यकारकेणापि कारकेन्द्रेण संयुते।
तीव्रबुद्धियुतो बालो राजमन्त्री भवेद्‌ ध्रुवम्‌॥ ३॥
amātyakārakeṇāpi kārakendreṇa saṁyute |
tīvrabuddhiyuto bālo rājamantrī bhaved dhruvam || 3||

अमात्यकारके विप्र सबले शुभसंयुते।
स्वक्षेत्रेस्वोच्चगे वापि राजमन्त्री भवेद्‌ ध्रुवम्‌॥ ४॥
amātyakārake vipra sabale śubhasaṁyute |
svakṣetresvoccage vāpi rājamantrī bhaved dhruvam || 4||

अमात्यकारके लग्ने पञ्चमे नवमेऽपि वा।
राजमन्त्री भवेद्‌ बालो विख्यातो नाऽत्रसंशयः॥ ५॥
amātyakārake lagne pañcame navame’pi vā |
rājamantrī bhaved bālo vikhyāto nā’trasaṁśayaḥ || 5||

आत्मकारकतः केन्द्रे कोणे वाऽमात्यकारके।
तदा राजकृपायुक्तो जातो राजाश्रितः सुखी॥ ६॥
ātmakārakataḥ kendre koṇe vā’mātyakārake |
tadā rājakṛpāyukto jāto rājāśritaḥ sukhī || 6||

कारकाच्च तथारूढात्‌ लग्नाच्च द्विजसत्तम।
तृतीये षष्ठभे पापैः सेनाधीशः प्रजायते॥ ७॥
kārakācca tathārūḍhāt lagnācca dvijasattama |
tṛtīye ṣaṣṭhabhe pāpaiḥ senādhīśaḥ prajāyate || 7||

कारके केन्द्रे कोणेषु स्वतुङ्गे वा स्वभे स्थिते।
भाग्यपेन युते दृष्टे राजमन्त्री भवेद्‌ ध्रुवम्‌॥ ८॥
kārake kendre koṇeṣu svatuṅge vā svabhe sthite |
bhāgyapena yute dṛṣṭe rājamantrī bhaved dhruvam || 8||

कारके जन्मराशीशे लग्नगे शुभसंयुते।
मन्त्रित्वे मुख्ययोगोऽयं वार्धकेनाऽत्र संशयः॥ ९॥
kārake janmarāśīśe lagnage śubhasaṁyute |
mantritve mukhyayogo’yaṁ vārdhakenā’tra saṁśayaḥ || 9||

कारके शुभसंयुक्ते पञ्चमे सप्तमेऽपि वा।
दशमे नवमे वाऽपि धनं राजाश्रयाद्‌ भवेत्‌॥ १०॥
kārake śubhasaṁyukte pañcame saptame’pi vā |
daśame navame vā’pi dhanaṁ rājāśrayād bhavet || 10||

भाग्यभावपदे लग्ने कारके नवमेऽपि वा।
राजसम्बन्धयोगोऽयं निर्विशंकं द्विजोत्तम॥ ११॥
bhāgyabhāvapade lagne kārake navame’pi vā |
rājasambandhayogo’yaṁ nirviśaṁkaṁ dvijottama || 11||

लाभेशे लाभभावस्थे पापदृष्टिविवर्जिते।
कारके शुभसंयुक्ते लाभस्तस्य नृपालयात्‌॥ १२॥
lābheśe lābhabhāvasthe pāpadṛṣṭivivarjite |
kārake śubhasaṁyukte lābhastasya nṛpālayāt || 12||

लग्नेशे राज्यभावस्थे राज्येशे लग्नसंस्थिते।
प्रबलो राजसम्बन्धयोगोऽयं परिकीर्तितः॥ १३॥
lagneśe rājyabhāvasthe rājyeśe lagnasaṁsthite |
prabalo rājasambandhayogo’yaṁ parikīrtitaḥ || 13||

कारकात्‌ तुर्यंभावस्थौ सितेन्दू द्विजसत्तम।
यस्य जन्मनि जातोऽयं राजचिह्नेन संयुतः॥ १४॥
kārakāt turyaṁbhāvasthau sitendū dvijasattama |
yasya janmani jāto’yaṁ rājacihnena saṁyutaḥ || 14||

लग्नेशे कारके वाऽपि पञ्चमेशेन संयुते।
केन्द्रे कोणे स्थिते तस्मिन्‌ राजमित्रं भवेन्नरः॥ १५॥
lagneśe kārake vā’pi pañcameśena saṁyute |
kendre koṇe sthite tasmin rājamitraṁ bhavennaraḥ || 15||